Contoh Puisi Madura : MAÈLANG KERRONG

Contoh Puisi Madura : MAÈLANG KERRONG

MAÈLANG KERRONG 
Angghidhân: Suhanda

Ènalèka tello polo lèma’ taon 
Bulâ bân kanca tapèsa è bâbâna sonarra arè 
Atè tapèngkot ḍâlem sokma akanca maghârsarè 
Sa’arè akantha sabulân, Samènggu akantha sataon, 
Pangarep atè bilâ sè tatemmowa

Ḍu... bilâ sè tatemmowa bân kanca
Kerrong ta’ marè-marè 
Sossa ta’ potos sa’arè 
Bhunga ta’ ghellem marè 
Kapèreng atemmowa saarè èpamarè

Duh... Kanca saomorra arè 
Bilâ sè tatemmowa? 
Bilâ polè sè abhârengnga? 
Lahèr bân bhâtèn patang ngarep 
Bulâ bân kanca èlang ḍâlem mèmpè 
Bulâ bân kanca tatemmo è ḍâlem mèmpè 
Tello polo lèma’ taon maèlang kerrong è konco’na sonarra arè

È sa’at anyabâ takbir 
Rassana atè paḍâ jhumambhâr 
Duh... kanca tatemmo bulâ bân dhika ènalèka paḍâ dhibâsa 
Rambhut obân ta’ kennèng tegghu’ 
Calana lorghâ ta’ bisa èkasabbhu’

È sa’at samangkèn ampon paḍâ akompol è sèttong pasèmowan 
“Temmo Kerrong maèlang sossa” 
Senneng sossa taleppèt ḍâlem sa’arè
Bhungana taḍâ’ paḍâ 
Lahèr bhâtèn paḍâ nyapora

Ḍu... kanca tor bhâlâ, 
Moghâ’â omor bân rajhekkè paḍâ lebbhur 
Jhemjhem atè pangarep saomorra 
Ana’ poto atong-rontong saomorra 

Du... kanca sè taḍâ’ tobugghâ 
Du’a’ paḍâ nyapora lahèr bhâtèn 
Malar mandhâr tatemmowa è taon sè bhâkal ḍâteng 
Bherkat omor mora rajhekkè 
Jhemjhem atè pangarep salanjhângnga

Tweet